Rundtur over toppane ved Gjesdalsdalen

Om turen

Beskrivelse

Dette er ein fin rundtur på fleire av toppane rundt vakre Gjesdalsdalen. Du er innom fleire toppar, og går i enkelt og fint turterreng mens du får flott utsikt i alle himmelretningar undervegs.

Turen startar på parkeringa ved Bakkestøylen. Du tek ein del høgdemeter opp til første toppen som heiter Varden. Her er utsikta over Vassenden og Jølstravatnet vid og open. Jamn stigning i fint og breidt ryggterreng opp til Kvamsfjellet som er høgste punkt på ruta. Her står værstasjonen plassert rett ved varden. Frå her går du vidare på breie og fine ryggar til Bordtaket og Tverrfjellet. Undervegs møter du mange små fine tjønn, og får stadig meir utsikt austover mot Holsen og Kvamshesten i vest. Du må nokre høgdemeter ned til idylliske Litlevatnet før du følgjer sti opp til Stølverlifjellet. Her ventar ein stor og flott varde på deg saman med flott utsikt vestover, og mot Snønipa, Middagsfjellet og Gjesdalsvatnet i aust. Retur på delvis merka og synleg sti ned frå Stølverlifjellet til Gjesdalsdalen. 

Turen går i lett og fint lyngterreng. Det er merka sti opp til Varden. Frå her går du i lyng og langs dyretråkk vidare til Kvamsfjellet, Bordtaket og Tverrfjellet. Ved Litlevatnet kan du finne varda sti opp til Stølverlifjellet. Frå denne kan du følgje eldre fjelltrimmerking og sti ned ryggen og ned til du nærmar deg lysløypene til Jølster løypelag. Når du møter desse er det berre å følgje dei vidare attende til parkeringa. Turen er kupert, og er på til saman omlag 1000 høgdemeter.

Turen er enkel og lett å gå når det er tørt og fint, og været er godt. Turen er likevel merka krevande pga. at ein går utanfor sti store delar av turen. Du må derfor kunne orientere deg i terrenget med kart og kompass dersom du får tåke og skodde undervegs.

AC Kapstad for IST