Stølverlifjellet

Om turen

Beskrivelse

Stølverlifjellet er ein gøymd topp i Gjesdalsdalen. Stølverlifjellet byr på fantastisk utsikt over Gjesdalsdalen på veg opp, og har ein praktfull varde på toppen. Dette sporet startar på parkeringa ved Bakkestøylen i Gjesdalsdalen. Første del av sporet går på sti i området der skiløypa til Jølster Løypelag går om vinteren. I det du tek av frå "skisporet" går ein del av sporet vidare i terreng der det ikkje er sti. Sporet er lagt slik at du går "effektivt" mot fjellet, på same tid som du får best mogeleg utsikt over Gjesdalsdalen. I stor grad føl du Litlebotsgrova opp til "foten" av fjellet der Finneskotet startar.

På veg opp ryggen går du sti, som tidvis er merka. På veg opp har du nydeleg utsikt over Gjesdalsdalen, Middagsfjellet, fjellvatna i Gjesdalsdalen og Gjesdalsvatnet i retning Sandalen. Du ser også ein "flik" av Jølstravatnet. Når du stig oppover får du utsikt mot heile Finneskotet, som er passasjen mot Holsen i Førde. På toppen ventar ein fantastisk varde på deg saman med panoramautsikt mot Kvamshestane i Gaular i vest og Snønipa.

Turen opp tek kring 1-1,5 time. Om du ønskjer det kan du på veg opp/ned gå oppom Bakkestøylen, som du passerer ganske nær der du parkerer i enden av skogsvegen. Du kan òg starte turen frå Trinta, som er parkeringa ved Gjesdalsstøylen. Du kan nytte sporet til Finneskotet (sjå lenke til denne turen) som utgangspunkt for starten av turen herifrå.

Finneskotet har truleg fått namnet sitt etter ei historie knytt til baronen Audun Hugleikson, som du kan lese meir om i ei av lenkene nedanfor.

AC Kapstad for IST