Olahansfjellet og Slutefjellet

Om turen

Beskrivelse

Denne turen er spora opp til Olahansfjellet og vidare som ein langtur langs ryggen til Slutefjellet. På veg opp til Olahansfjellet tek du mesteparten av høgdene og brukar omlag 2 timar opp. Du kan velje å ende turen din her, eller ta fatt på den lange og breie ryggen vidare inn mot Slutefjellet. Turen tur/retur frå enden av skogsvegen i Myklebustdalen i Dvergsdalen til Slutefjellet er på kring 1,5 mil. Turen til Slutefjellet er definert som raud (krevande). Turen til Olahansfjellet er definert som blå (middels).

GPS-sporet på denne turen startar i enden av skogsvegen ved Myklebuststøylen. Frå støylen følgjer du relativt godt synleg sti opp mot Olahansfjellet, som av lokale vert kalla "Olahansen". Langs stien finn du tidvis raude merke etter eldre fjelltrimpost. Toppen av "Olahansen" byr på praktfull utsikt mot både aust og vest, og har eige utsiktspunkt med nokre flotte vardar som vaktar over dalføret under. 

Frå Olahansfjellet går du sørover langs brei rygg med flott utsikt ned i Skryklingen bl.a. Frå Olahansfjellet må du ned 100-150 høgdemeter før du tek fatt på slak stigning langs ryggen. Denne har eit underlag med ein del stein, og du må igjennom nokre urer på vegen mot toppen. Steinen i landskapet ligg stabilt og er relativt enkel å gå i. Men terrenget er likevel noko "røffare" å gå i enn vanleg på ein del andre ryggar i Jølster. På toppen av Slutefjellet får du panoramautsikt mot austlegaste fjella i Jølster og mange flotte toppar i Haukedalen.

Turen tek mellom 7-9 timar tur-retur i normaltempo utan pausar. Vi har lagt spora som ein rundtur langs ryggen slik at denne kan opplevast frå begge sider. Nokre stader er det spor du kan følgje etter merker ein fjelltrimpost på Slutefjellet i 2008. Desse merka går på vestlegaste side av ryggen. Det er verdt å merke seg at du må rekne med å bruke like mykje krefter på returen langs ryggen som du gjorde opp mot toppen.

Snøen kan både ligge lenge utover våren, og kome tidleg på hausten i dette fjellpartiet. Du er og i eit områdesom ligg nært Grovabreen og Jostedalsbreen. Dette kan medføre at vinden kan bite litt ekstra. Sidan du går på rygg store delar av dagen må du kunne orientere med bruk av kart og kompass dersom du skulle få skodde. Det er få returpunkt ned i dalføra som går langs ryggen, og det er berre tidvis mobildekning i området.

AC Kapstad for IST